By Lala Khobung
Mi threnkhat chu hei inhmu changin ieng le inzom mang lo hin, “I va thau de” ti trongkam hih ka dong zeu zeu. Fiemthu’n, “Ka thau hranpa noh ie, ka lutna kawr a china, ka normar lei a nih” ka ti naw leh na deu trol hin, “ka thau le thau naw chuh i mi hril hranpa ngailoin nang nekin ka hriet daih!” dam ka ti hlak.
Trumkhat chu veng tienga ka hang suok trum nupui pakhat tuta hmaa ka la hriet ngai khom ni lo hmeraw zor hih kan in-ah a hung a, “I va zuk thau em em de” a mi ti a, kei chun ka don lem noh. A thil hril chuh ka hrietnaw a sawn leiin a mi hung hnai a, a neka inring lemin, “i va thau de aw” ami hung ti nawk a. Invet le mawl ka ti em leiin kei chun “ka thau le thau naw chuh i mi hril ka ngai noh, nang nekin ka hriet lem daih an naw, ka va hei invetin ka va hei mawl em em de aw i tina a ni chuh” ka hei ti fok el a. Ama chun “iem a ti leh?” a mi hung ti a. Chu phing leh kei chun thradeu hin ka hei hrilfie a, mi hai an bulah “I THAU” ti ngai lo ding a ni zie hai chuh ka hril fie a. Amanu hin chuh lungril thra tak put pumin ka lawm zawng hrila inngaiin, “I va hang hriselin i fak a va thra de” tina ah ngai mei a tih. Sap le hnam changkang deu hai chop-le-chila suk lungsen i nuom chun “I VA THAU DE” hei ti roh. An ni chun inhmusitna le indeusawna-ah ngaiin “mi invet, iengakhom ka ngainaw che, i mawlin i nal naw taluo, i hriselna khom ngaituo loin i hmu le i du du insumna le chintawk khom nei der loin i fak tuom tuom el hlak a ni hi tie, i tha khom a bo, mi invet tak i ni hih” tina-ah ngai nghal an tih.
Mi kumzat, abikin nunghak senior deu hai, indon hih an lawm naw tlangpui. Sap le ram changkanga mihai chun, trulna leia mi kum an indon chang, “How old are you?” ti loin “How young are you?” an ti lem hlak. An ti an nawm, nuhmei hai hi pasal an nei hma chun kum 18 nekin an upa nuom ngai noh. Nunghak senior deuh ta hih a kum an indona, ama chun khel hril a nuom si noh. “Kum 17 le thla iemanizat” ti in a dona. “Thla iengzatam ie” an hang ti chun “Thla 36” a tih.
Mi threnkhat chun NUPUI ti aiah TARNU ti an hmang hlak. Tar ti tak lem hi chuh Sap hai khun an lawm naw vieu. Haflong-a ka zun zin trumin papui pakhatin, “Ukil maw i nih?” a mi ti a, kei chun “Aw” ka ti a, ama chun “chu dawha i va hau awm de?” a mi tih. Hotupa Dr. Rochunga Pudaite student a ni lai Leiri khuoa a hang inzin trumin Papui pakhatin “En ta ro, ei Pudaitepa hih a bawkah dawha a um” a lo ti khah ka hriet suok. N.C. Hills, abikin Leiri khuo haiin DAWHA an ti hih a thra tienga VAR an tina a nih. Amiruokchu, Manipur le hmundang tieng hai chun mi vervek, mi teplo, vai haiin phakar/chalak an tina-ah an ngai.
Trongbau chauh loa khom hriet dinga thra chu, mi leh ei lo inbiek laklaw lai ieng thu am ei lo titi ti khom ngaituo loin an mi hung zom ve chot a, ei lo inbiekpui hai mit mei khom veng der loin, “thaw roh in chibai ei tih” an ti le an mi hung ban an ruol a, in chibai le inruolin ei lo inbiekpui hai khah ngaisak der loin an hril nuom hai chuh hrilin an mi hei biek zui el ta hlak a. Ei lo inbiekpui hai ta ding khan chuh a hril hai thlak khop el. Hnam changkang hai chun, mi an lo inbiek laia tu lem lem khom an biek nuom chun va paw el loin an la nghak a, an inhmaw deu an chun hawihawm le inphalam takin “mi hre thiem unla, lunginsiettakin la hei chok buoi vak thei ka cheu?” an ti hmasa phot hlak. Rem an ti chun ei biek nuom pa khah ei biek chauh hlak. Chun, in le pindan a lut tawm a kotkhar kik lo le mi khum pindan a lut mei mei hi chuh a ching ei um ta naw vieuin ka hriet.
Thil inzakum le mawi naw em em chu, inkhawm trin tawma Lalpa trongtraina or benediction hril lai, “A nuhnung hnung phung in se” ti ni awm fahran a Biekin/Hall a inthok a suok hum hum mi tamtak in an ching hih a nih. Minute khat vel chauh la hei nghak hram hram chuh thil intak le harsa khom an noh. Lo theilo le emergency thil a chuh thu dang. Naupang ni lai a hotu in trin taro a ti le inruol a inhmaw em em a tlan malam a “kei ka suok hmasatak” ti lai hun le khan an dang lamna a um noh. Hi thil mawinaw tak hi chuh ching tanaw hram ei tiu khai.
No comments:
Post a Comment