By Lala Khobung
English hi hausa kan ti fo a, Mizo tawng pawh hi duai lo tak a ni. English chuan tui hmanga thil tih fai na sawi nan WASH hi an hmang rim viau. Keini erawh chuan, lu kan su, hmai kan phih, ke kan sil, thleng kan tleuh, bel kan nawt. Tui lianin a lak leh len te sawi nan thleng wash hi an hmang.
CARRY tak hi a nia an hman rim. Keini chuan kutin kan hum, kan khai, kan chawi, kan dom, kan dawm, kan char. Kan lu-in kan phur, tui kan chawi, kan chhipchhuan, buh kan thiar. Kan kokiin iptepui kan ak, nau kan pua, thing kan pu, tui kan kawt, nghawngkawl kan bat, naute kan hma theh. Heng bakah hian nau kan pawm, thil kan zakzeh, kan zin changin thiante thil kan hawnsak, thil lian tham deuh a nihin motor kan phurhtir, football kan khalh, thusawi kan chhunzawm, exam question-ah mark phurh zat kan pe, kan fanu te thuam kan chhawmtir. He’ng velah hian English ho chuan CARRY hi an hmang tlut tlut mai a ni.
Incheina/thuamnaah pawh WEAR hi hmang rim tak an ni. Kei ni chuan kekawr kan ha, puan kan sin, shawl kan bat, hrenpereng kan kai, pheikhawk kan bun, nghawngawrh kan suih, lu kan kawm, lukhum kan khum, diar kan khim, tonlairang kan tawn, puanfen kan feng, puan kan bih, bengbeh kan beh, thi kan awrh, bakkilh kan kilh.
English ho chuan in tihfaina lamah WASH an hmang vek naa, keini chuan lu kan su, ke kan sil, thleng kan tleuh, hmai kan phih, tui lian kan laktir.
Thil han in kawh hmuh na ah pawh HERE leh THERE bak an nei meuh lo. Kei ni chuan – he tah, hee-tah, heeee-tah, sawtah, sawaw-tah, khi tah, khiiii-tah, khutah, khuuu-tah. English in – earth, ground, soil, mould, tongue, pour, fine, bridge, buy, lean, debt, foe, pour, purchase an hmannaah hian kei ni chuan LEI hi kan hmang then mai. Ka thian Paite te hnenah, “Keini Hmarho hi chuan Paite nen vawkte um hi kan inthlauhna chu, keini chuan khi-khi, khu, saw-saw, he lam, kha lam, khi lam, khu lam, kan nei a, nang ni chuan HUAI LAMAH tih bak in nei si lo” ka ti thin. Kan tawnga POWDER DIAK kan tih erawh hi chu tu mah siam theih loh leh thil awm thei lo a ni tlat. Powder hi a diak thei lo hrim hrim.
Lusei pa leh Hmar pa hi tawng thuah an inhnial a. Lusei pa chuan, Hmarho hi CHHANG te hi BEI in ti a, a dik lo, a ti a. A chhan a han zawh chuan, bangah an han vawm a, a bei thlap a, chu vang tak chuan a lawm CHHANG kan tih a ti a. Hmar pa ve thung chuan Lusei ho hi MENGTE te hi ZAWHTE te in ti a, a dik lo, a ti ve a. A chhan a han zawh chuan, thil tereuhte hi a zawh a, chu vang tak chuan a lawm MENGTE an tih, a ti ve daih.
No comments:
Post a Comment