By Lala Khobung
1. Nau puonpuok sukfuol deu hin ei nau puokin inhawi an ti in an tlei nuom a, ei dar zawnlai hih a phek ei suklien deua dar a kham intakin a zie a um.
2. Puonbil le nau-ek sawp hih midang hai lo hmu a khawm puon dang sawp leh an danglam chuong nawh. Amiruokchu, a hei em phar lai vel tak hih tlawm thlak deua i ngai chun i sawp hma khan i nuhmei chuh a emtu dingin ngen hmasa phawt hlak rawh. Alo remti naw pal ani chun ‘nisa a em chuh a rawng a da nuom’ ti la, in sungah em el hlak rawh.
3. I nuhmei in a vuok chang che to tawkin a ru hlatna tieng tieng daw el hlak la, tlan se ngai der naw la, tuor fan fan lem hlak rawh. Tuorsel tak le taima taka i tuor phawt chun vaw sawt pei bik naw ni che. Chun, thenum khawveng hai hriet khawpin i tuor khah a sa ting el ding a nih. Khek ngai der naw rawh, chuongnaw chun i tuor a sa ting el ding a nih.
4. I nuhmei a zing tho hmaa thingpui i pek chang ‘bau thuo hma hmaa’ alo ti a, i pek naw leh a lung a sen inlau bawk si chun thingpui, bau thuona ding le a dawna ding maihuon ruok a ruolin a khum bulah sie el hlak la, chuongchun a nuom lem lem thaw hmasa el a tih. Hi baka hin hmai hrukna (towel) khah sie theinghil der lo ding.
5. Midang khawma lo nei hai sien ngam bik naw ni hai ti hre zing puma i nuhmei khah i lo nei a nih ti khah hre zing la, insir nuom ngai der naw rawh. Insirin umzie a nei chuong ta nawh. Ti tak em a chuh pasal ila ni zing tho an nawm, thang fan fan lem rawh.
6. Thaibawi ni hih inzak ngai der naw rawh, midang khawm an ni ve tho. An inthup thiem lei chauha inlang ve lo mei mei an nih. Andik tak a chun i phullo nuhmei i nei tina a nih a, ngai tha takin um el rawh.
7. Upa haiin ‘nuhmei kutbe chuh sahriek le meilumin a dam hlak,’ an tih an nawm. I nuhmei in a vuok chang che, a vuokna hai khah tel lumin zut la, mei lumah em hlak rawh. Chun tel in nei naw ani chun vawk hriek khawm a pawi nawh. Chuong nawk peia ala ngaithiemnaw ani chun i sunghai intieng hun iemanichen zam hri phawt el rawh.
8. In zin suok chang i nauhai nekin i nuhmei lawm zawng ding phur pek hlak la, ni hni ni thum vel chuh i chunga a kut thlak ding i pumpel el thei. I vangnei hle lem chun in i tlungni tuka zing tho, nau puok, nau ek le zundap sawp chen khawm i awl el thei.
9. I nuhmei a lung a awinaw changa a hnawtsuok che chun i tarpu hai in tieng zam lem hlak rawh. I pa hai in tienga zam nek chun a khawhnung peiah kut tuor a nep nuom deu hlak. I tarpu hai in tieng i zam ani chun i nuhmei khah hung ngei a ta, chu pha chun i tarpi khah nang a tieng lo thang a ta i nuhmei khah a hung le inruolin i tarpi in ‘det dutah” alo ti el ding a nih. Amiruokchu, hi thil hi chuh a risk an sang vieu.
10. Naute tui insiltir le puon i sawplai i ruolhai an hung leng vai chun ‘kei hi chuh ka uluka, nuhmei hin chuh an thiem tak tak nawh,’ ti then el rawh. I nuhmei khah nuhmei pangngai ani chun ngaimaw taluo chuong naw nih. Alo ngaimaw pal hlauh ani chun leh i changsuol ve tum ni el a ta, i tuor ma ding chuh ni el tanaw ni’m leh. Changsuol tum hi chuh a um hlak reng a nih.
11. I ruolhai umlai i nuhmei in a kamkhat che chun dawnlet ngai der naw rawh. I dawn leta i thiemthu i hril vai chun i ruolhai umnaw phat i tuor a sa ting el ding a nih.
12. Nuhmei hai hal pumpel dan chikhat chu zingkar inhma taka thoa, hmun hai fai taka phit vawnga, an zing thingpui ding inhnik taka siem zoah nau puoka tarpu hai in a leng hih anih.
13. Zanah i leng sawt deu chang, in i tlung charin hei indap vel la, ‘Ehe... in puhai inah ka meitawk ka theinghil ana, ngaituo umnaw nih, anni hi chuh an fela, lo sietha el an tih,’ hei ti la, i nuhmei a lung a lo sen khawma a zie um deu a tih. Chun, i nuhmei a lung ala sen rawp ani chun thildang hril loin, titak deuin, ‘Ei pastor Bible chang hrilfie dan hi chuh ka ngaidan a va hang ni naw de aw!’ hei ti la, i nuhmei chun Pastor leh in inpawl leia inlawi inhnu sawn el a ti che.
14. Mi’n Thaibawi an ti nawna ding chen mi TAIMA anga inlang khah tum hram hram hlak rawh.
15. Andik taka chuh tulai mi tu khawm Thaibawi an um ta nawh. Sungkuo thangruol an ni ta lem.
No comments:
Post a Comment